[ هل الشعب السعودي فاصل/منتهي/ماله حل؟! ]

:: أقسم بالله الشعب السعودي فاصل يا ولد.. .
= الشعب السعودي؟!! الـ 27 مليون ما غيرهم؟!!
:: إي نعم.
= ليش طيب؟!
:: شف المقطع بالله.

(مقطع يحوي أربعة مراهقين يقومون بفعل مضحك/خطير/غريب.. ونحوه)

= طيب؟! وبعدين؟!!
:: وش اللي طيب وبعدين؟!!.. أقسم بالله فصلة.. شعب رايح فيها.
= يا أخي أنا ماني قاعد أشوف 27 مليون سعودي داخل المقطع، أنا أشوف 4 مراهقين بس.. هذا أولا، ثانيًا.. على فرض إنهم فاصلين المفترض تقول: 4 شباب فاصلين، ما تقول أربع شباب "سعوديين" فاصلين، لأنه ممكن واحد منهم قريب لهم جاي من الكويت أو الإمارات أو قطر وما معه جنسية، فهو لابس ثوب ومتلطم، ويمكن بعد من جنسية عربية أخرى لأن بعضهم في مجتمعنا اعتادوا على لبس الثوب..
:: لكن..
= لحظة خلني أكمل..
:: يا والله البلشة !
= وبعدين بالمنطق يا أخي: إيش دخل الـ 27 مليون علشان تقول إنهم فاصلين؟!
:: أنا شفت مقاطع كثيرة من أيام البلوتوث، كلها فصلات وضحك، يعني ما أقول كلهم لكن أقول حالة عامة لكثرة المقاطع يعني.
= طيب كم مقطع شفت انت؟ ولو تقريبًا
:: والله.. ممكن تصل لـ 2000 - 3000 مقطع.
= خذ مني 50 ألف مقطع.. منطقيًا ما شفنا 27 مليون مقطع لـ 27 مليون مواطن سعودي، مع العلم إننا ممكن نحسب تكرار بعض الشباب لمواقفهم وتصوير أنفسهم بأكثر من مقطع، وبعدين أنا أعرف سعوديين ثقيلين دم وكثير عاملين ثقل وكثير شباب حركاتهم حركات شيبان.. احنا بالكاد نبغى منهم البسمة فما بالك إنهم يعملون حركات فاصلة ويصورون أنفسهم.. من ثامن المستحيلات.
:: ثامن؟!!
= وبعدين بالمنطق يعني بالمنطق: إيش دراك إن اللي بالمقطع فاصلين؟! يا أخي من الممكن شباب محترمين جلسوا جلسة وناسة بالاستراحة وصار الموقف هذا كمزحة عابرة مو من طبعهم إنهم يكثرون منها، لكنهم شباب عاقلين ممكن إذا بغوا يكررون اللي تسميه الفصلة هذي يستحون أو يشوفونها سماجة.. يعني باختصار ممكن المقطع ما يعبر عن حياتهم ولا يمثلها.. مجرد موقف عابر يصير مع أكثر الناس مروءة.
غير كذا لو كان شعب فاصل مالقيت آلاف الردود من السعوديين يضحكون ويستغربون من هذه المقاطع ويرددون باندهاش: شعب فاصل، طيب يا أخي لو كان فاصل أصلا كان صار الأمر عادي عندك ولما استحق النشر والهياط حوله لأنك اعتدت عليه.
ومن ناحية أخرى، تتوقع مثلا الشعوب الثانية جالسين يبكون داخل صومعات مثلًا؟ مثلكم مثلهم شبابهم -مو كلهم- لهم مقاطع كثيرة وفصلات وقفشات ومواقف، مو بس انتم.
والعجيب يجيك واحد عمره 15 ما تعدى حوطة بيتهم ويقول: بحياتي ما شفت شعب فاصل مثل هالشعب! لا يا شيخ؟! يعني أثناء جولتك بالدول الاسكندنافية ما مريت بطريقك بشباب فاصل؟! طيب دول جنوب شرق آسيا؟! اليوتيوب ينزل فيه ملايين المقاطع من جميع اللغات، ما مريت -بما أن لغاتك واسعة- على مقاطع شباب فاصلين لشعب ثاني؟!
أنت فقط عايش جوّك عزيزي.. راعي الغنم في داخل الصحراء ممكن يعيش جوّه مع قدر الطبخ وعصاه والذئب والغنم.. ويجد ما يضحكه ويجعله يفل والدينه.. فأنت..
:: آآ.. انت من قاعد تكلم؟! انت معي هنا.. !
= لحظة لحظة.. أنا لازم أبين الصورة المنطقية، المشكلة إنك انت يا صديقي دخلت من مقطع لمقطع لمقطع لمقطع كلها مواقف مضحكة، وبسبب تَتابعها عليك جاء حكم التعميم على الشعب السعودي، وبقية الردود جت متشبعّة بهذه الجملة التي تدخلهم جو خاص تتعانق فيها مشاعرهم بسبب جُمَل ترفّع فيهم من مثل: الشعب السعودي فاصل.. شعب منتهي.. شعب ماله حال.. إلخ إلخ.
:: ياولد توبة خلاص ما أوريك مقطـ..
= ما كملت يا أخي.. بالمنطق يا عزيزي بالمنطق: افرض إنك دخلت مقاطع سرقة متتابعة حدثت في منطقة معينة، بالتأكيد راح تُشحن نفسيًا ضد المنطقة هذي وتعطيها حكم عام بناء على مقاطع كثيرة عليك وقليلة بالنسبة لأهالي المنطقة.. .
فيا أخي تراكم أزعجتم أم أمنا بإبرة النشوة اللحظية هذي اللي تعيشونها من خلال هالجمل، تذكروني إذا شفت برنامج حلو أو مسلسل بالتلفزيون وبجنبك واحد يصج راسك لما ينتعش ويتهوّل من كل لقطة مدهشة أو مفاجئة أو غريبة بأصوات وشهقات ثقيلة على النفس ويقوم ينظر لك حتى يشوف ملامحك لرؤية انطباعك من اللقطة، ويردد: شفته؟! واااااو؟! يخرب بيته!.. إلخ، ووجه الشبه هو: التعزيز والهياط اللي ماله داعي لأمر لا يستحق كل هذا الضجيج.
:: يا ولد صاير تخوفني انت إذا تكلمت كذا، ممكن أمشي؟
= افرنقع يالله ولا تعود لهالجملة.. عالم منتهية صحيح!!!